ភ្នំពេញ៖ បន្ទាប់ពីប្រទានទៀនជ័យអបអរទិវាបុណ្យឯករាជ្យជាតិលើកទី៧០ អស់ ៣ថ្ងៃមក នៅវិមានឯករាជ្យ ព្រះមហាក្សត្រសម្ដេច ព្រះបរមនាថ នរោត្តម សីហមុនី ស្ដេចយាងពន្លត់ទៀនជ័យ នៅល្ងាច ថ្ងៃទី១១ ខែវិច្ឆិកា ឆ្នាំ២០២៣នេះ។
គួរឲ្យដឹងដែរថា ប្រទេសបារាំងបានដាក់អាណានិគមន៍លើកម្ពុជាអស់រយៈពេលជិតមួយសតវត្សរ៍ (១១ សីហា ១៨៦៣ – ៩ វិច្ឆិកា ១៩៥៣)។ ឯករាជ្យជាតិរបស់កម្ពុជា ត្រូវបានទទួលមកវិញក្រោមស្នាព្រះហស្ថរបស់អតីតព្រះមហាក្សត្រសម្ដេច ព្រះនរោត្តម សីហនុ នឹងបានប្រកាសនៅថ្ងៃទី៩ ខែវិច្ឆិកា ឆ្នាំ១៩៥៣។ ប្រជារាស្ត្រកម្ពុជាទូទាំងប្រទេស បានថ្វាយព្រះកិត្តិនាមព្រះអង្គជា «ព្រះមហាវីរបុរសជាតិ ព្រះបិតាឯករាជ្យជាតិ»។
ដើម្បីជាការចងចាំនូវព្រះរាជស្នាព្រះហស្ថដ៏ឧត្តុងឧត្តម នៃការទាមទារឯករាជពីអាណានិគមបារាំងនេះ វិមានឯករាជ្យត្រូវបានកសាង និងសម្ពោធដាក់ឲ្យប្រើប្រាស់នៅឆ្នាំ១៩៥៨៕
